12:24 - 16.07.2026

---

16 iyul, Fineko/abc.az. Yüksək inflyasiya fonunda Türkiyənin ən iri nominalı olan 200 lirəlik əskinasın (təxminən 4,35 dollar) alıcılıq qabiliyyəti 2009-cu ildə dövriyyəyə buraxıldığı vaxtdan etibarən təxminən 26 dəfə azalıb.

Ekonomım qəzetinin məlumatına görə, 2009-cu ildə bu əskinasla əldə edilə bilən mal və xidmətlərin dəyəri hazırda təxminən 5 143 lirəyə çatıb.

Bununla yanaşı, Türkiyədə nağd pul dövriyyəsində 200 lirəlik əskinasların payı rekord həddə — 88,7%-ə yüksəlib. Ümumi həcmi 928,4 milyard lirə olan nağd pul dövriyyəsinin 823,6 milyard lirəsi bu nominalın payına düşür.

200 lirəlik əskinas 2009-cu ilin yanvarında dövriyyəyə buraxılıb və ölkənin ən yüksək nominalı olaraq qalır. Türkiyədə inflyasiya fonunda daha böyük nominallı əskinasların buraxılması müzakirə olunsa da, Mərkəzi Bank hələlik bununla bağlı plan açıqlamayıb.