15:24 - 17.07.2026

---

17 iyul, Fineko/abc.az. Çin dövlət şirkətləri Sinopec və PetroChina Hörmüz boğazı vasitəsilə gəmiçiliyin pozulması fonunda Qətərdən asılılığı azaltmaq üçün yeni mayeləşdirilmiş təbii qaz (LNG) tədarükçüləri ilə danışıqlara başlayıb.

Şirkətlər müddəti ən azı 10 il olan uzunmüddətli müqavilələri nəzərdən keçirir, yeni razılaşmalar üzrə tədarüklərin 2030-cu ildən əvvəl başlaması gözlənilir. LNG üzrə mümkün yeni mənbələrdən biri Kanada hesab olunur.

Dünyanın ən böyük LNG idxalçısı olan Çin Qətərlə mövcud müqavilələrdən imtina etməyi planlaşdırmır, yalnız tədarük mənbələrini şaxələndirmək istəyir. Daha əvvəl Qətər Çinin LNG idxalının təxminən 30%-ni təmin edirdi.

Gəmiçilikdə yaranan çətinliklər fonunda Qətərdən tədarüklər kəskin azalıb: aprel-iyun aylarında Çin bu ölkədən təxminən 100 min ton LNG idxal edib, halbuki ötən ilin eyni dövründə bu göstərici 4,7 milyon ton olub.