10:11 - 1.07.2026

---

1 iyul, Fineko/abc.az. ABŞ Federal Ehtiyat Sisteminin (FED) faiz dərəcələrini uzun müddət yüksək saxlayacağı gözləntiləri və ən böyük institusional alıcılardan biri olan "Strategy" şirkəti ilə bağlı narahatlıqlar fonunda kriptovalyuta bazarında kəskin eniş qeydə alınıb.

ABC.AZ xəbər verir ki, bitkoinin qiyməti Asiya birjalarında 1,5% ucuzlaşaraq 57 742 dollara düşüb. Bu, 17 sentyabr 2024-cü ildən bəri qeydə alınan ən aşağı göstəricidir.

Analitiklərin fikrincə, FED rəsmilərinin sərt bəyanatları investorları gəlir gətirməyən aktivlərdən (kriptovalyutalardan) uzaqlaşdırır. Təkcə iyun ayında ABŞ-da fəaliyyət göstərən bitkoin birja fondlarından (ETF) 4 milyard dollardan çox vəsait çıxarılıb ki, bu da son iki ilin ən böyük aylıq kapital axınıdır.

Eyni zamanda, Maykl Seylorun (Michael Saylor) "Strategy" şirkətində tətbiq etdiyi maliyyələşmə strategiyasındakı dəyişikliklər bitkoinə olan daimi tələb mənbəyinin zəifləyə biləcəyi qorxusunu yaradıb və bu da qiymətlərə mənfi təsir göstərib.